28.07.1955 – 17.11.2022
De Nedderdüütsche Bühne denkt in düsse Tieden an Hartmut Cyriacks, de verleden Dünnersdag sturven is.
He hett sik sien levenlang för de plattdüütsche Spraak insett un hett sik as Översetter, Dramaturg un Schriever en Naam maakt. 1985 woor he Dramaturg bi dat Ohnsorg-Theater in Hamborg un hett door ok sien Kolleeg un Fründ Peter Nissen kennenlert. 1994 hebbt de beiden de Textmanufaktur in Ottensen op de Been stellt. In de meist 30 Johren hebbt se vele Texte in’t Plattdüütsche överdragen. Dorünner ok Harry Potter un Asterix un Obelix. Ok in’t Fernsehn weer se ehr Könen bi Büttenwarder to hören un bi’t Radio, wo he Spreker vun de plattdüütschen Narichten weer. För se ehr Warken hebbt se vele Priese kregen, so as de Nedderdüütsche Literaturpries vun Kappeln, de Heinrich-Schmidt-Barrien-Pries un mehr.
Ok de Nedderdüütsche Bühn in Kiel hett Stücke speelt, de vun Hartmut Cyriacks un Peter Nissen överdragen woorn sünd. Op’t Letzt „Elling“ in’t Fröhjohr 2022. Wi seggen danke för all de Knööf, de plietsche Kopp un de jümmers fründliche Minsch de du ween büst.
Uns Gedanken sünd bi sien Familie un sien Fründ un Kolleeg.