Jürgen Witt

Darsteller, Übersetzer

„Ward dat wat? Dat ward wat!“

Woans ik an de Nedderdüütsche Bühn Kiel kamen bün:

In ’n Harvst 1989 seet ik mit Horst Petersen in ‚t „Porticus“ güntsiet vun de Fensburger Marienkark. Wi vertellen uns ’n beten vun’nanner un he fröög mi denn, neem ik herkaam un neem ik opwussen bün. „In Kappeln“, sä ik. De nehgste Fraag keem „Zack“ achterran, wat ik denn ok Plattdüütsch snacken oder tominnst verstahn kunn. Ik weer noch an ‚t Överleggen, dor snack he al wieder: He harr en schönet Hobby: Theater spelen – plattdüütschet Theater an de Nedderdüütsche Bühn Kiel. Af un an wöör he ok Regie maken, so as nu. Un jüst nu weern em twee Schauspelers ut sien Ensemble afsprungen un he harr noch keen Ersatz funnen. In acht Weken schull al Premiere sien. Villicht harr ik ja Lust, weer ok keen grote Rull un dat beten Plattdüütsch dat wöör he mi al bibögen. Dat dä doch allens wunnerboor passen! Oder? Dat pass! In ’n Januar 1990 weer Premiere un ik bün hüüt noch froh, dat Horst Petersen mi domals besabbelt hett.